اسم من اسماء الله الحسنى
ليه الارض و السماء مش بينطبقوا على بعض و يقعوا ، ليه الكون كله ثابت بالشكل الدقيق جدا ده اللي لو اتغير فيه حاجه بمقدار ذرة ، الكون ده هيتدمر ،، بس ده مش هيحصل غير بإرادة من الحفيظ
الحفيظ ، اسم من اسماء الله الحسنى ، معناه اللغوي جاي من الحفظ و العناية و الحماية، وهو صيغة مبالغة من اسم الفاعل الحافظ بيدل على شدة العناية الالهية بالشئ ده ، لكن لما نييجي للمعنى التفسيري هنلاقي حاجات جميلة جدا ،،
هنلاقي ان
– ربنا بيحفظ اولياءه من الذنوب و الوقوع في المعاصي ، و بيحفظهم من الشياطين ، و بيلطف بيهم دائما و ابدا .
– ربنا احصى و حفظ اعمال كل البشر الى يوم يبعثون و يحاسبون .
– ربنا بيحفظ الكون من التغير الغريب اللي بيؤدي لهلاكه الى ان يشاء ، و بيحفظ السماوات و الارض من انهم يزولا و يقعوا على بعض زي ماقال في كتابه الكريم : ” إِنَّ اللَّهَ يُمْسِكُ السَّمَاوَاتِ وَالْأَرْضَ أَن تَزُولَا ” فاطر (41) .
– ربنا بيحفظك انت شخصيا في مواقف انت بعدها بتقول انا كنت ميت ميت ، ده حفظ ربنا طبعا كلنا لينا كتاب و لحظه معينة هنموت عندها ، لكن ربنا لازم يحفظك لحد اللحظه دي ، معاك مَلَكيْن بالنهار و مَلَكيْن بالليل بيحرسوك طول الوقت زي ماجه في سورة الرعد : “لَهُ مُعَقِّبَاتٌ مِّن بَيْنِ يَدَيْهِ وَمِنْ خَلْفِهِ يَحْفَظُونَهُ مِنْ أَمْرِ اللَّهِ ” الرعد (11)، و ده حفظ ، و حاجه عظيمة جدا من قدرات ربنا .
و علشان مانطولش و تكون القراءة ممتعة ، لازم نحاول نتدبر ف آيات ربنا اللي حوالينا على قد مانقدر ، حاجه صادفتنا حلوه نفسنا نعرف عنها ، نبحث و نحاول ندور عنها ، هتضيفلنا يقين و ايمان اعظم بقدرات ربنا و عظمته و هتقلل جوانا الشكوك و قلة الايمان مع الوقت ،
سبحانك اللهم و بحمدك أشهد أن لا إله إلا أنت أستغفرك و أتوب إليك <3
