من سلاله اسماعيل خرج فهر وليه اسم اخر احنا عارفينه هو ” قريش ” ومن سلاله قريش خرج قصي بن كلاب وكان من ابنائه ” عبد مناف ” وكان من ابنائه ” هاشم” و ” المطلب ” هاشم كان له ولد اسمه شيبه ولما مات هاشم اخوه المطلب كفل ابنه شيبه ومن كتر الناس ما كانوا بيشوفوا شيبه ماشي مع المطلب سموه
” عبد المطلب ” وهو ده جد الرسول ” صلي الله عليه وسلم ”
عبد المطلب كان له 10 اولاد و 6 بنات
من اولاده اللي لحقوا الاسلام واسلموا العباس وحمزه
ومن اولاده اللي لحقوا الاسلام وما اسلموش ابو طالب وابو لهب
ومن اولاده اللي ما لحقوش الاسلام “عبد الله ” وده والد النبي صلي الله عليه وسلم
عبد المطلب جد النبى زوج ابنه عبد الله من امنه ام الرسول اللى كانت من اشراف يثرب و رجع مكة وحملت ام النبى فيه و بعدها توفى ابو النبى فتيتم النبى قبل ان يولد لحد ما جه يوم ميلاد النبى يوم الاثنين الثانى عشر من ربيع الاول اللى هو خمسين يوم من بعد حادث الفيل
جده عبد المطلب قال ان هيبقاله شأن عظيم و اخد الرسول و دخل الكعبة وشكر الله ايه بقى قصة اسم محمد؟!!! ان عبد المطلب كان مسافر الشام مع 3 من اصحابه و قابلوا احبار اليهود المهم اليهود دول قالولهم ان مكة هيخرج منها نبى اسمه محمد و الاسم ده مكانش حد بيسميه فى العرب خالص فلما رجعوا الاربعة قالوا كل واحد هيخلف هيسمى ابنه محمد بقى ومن هنا كان اسم الرسول ” صلي الله عليه وسلم ”
كانوا قريش بياخدوا الاطفال يربوهم فى الصحرا علشان يبقوا خشنين وبعيد عن امراض المدينة والحضر و كانواا الاعراب بياخدوا اكرامية مقابل تربية الاطفال دول و من هنا كانت حليمة هى مرضعة الرسول ” صلي الله عليه وسلم “
